സതീശൻ എടക്കുടി
ദുർമരണത്തിന്റെ പ്രേതലായനിയിൽ
നിർത്താതെ പെയ്യുന്നു നിലവിളി
മധുവാക്കുമൊഴിയുന്ന ചുണ്ടുകളിൽ
പകപ്പിറവിതൻ ശീൽക്കാരമന്ത്രം
നോവിൻതീരത്തിലലിയുന്നമൗനാഗ്നിയി
ദിനരാത്രങ്ങളുടെ ശവഘോഷയാത്ര
വേനലിന്നഴികളിൽ മിഴിനീരിൻ ലവണരസം
പിതൃയാനരഥ്യതൻ രാസലീലയിൽ
ദണ്ഡനീതികളുടെ ഘടികാരശബ്ദം
ചുട്ടുകത്തിച്ചു ചുരങ്ങൾ താണ്ടവെ
വെന്തുചാമ്പലായ തലയോട്ടിയുമായ്‌
കർക്കിടകരാത്രിതൻ തോരോട്ടം
വാങ്മയതപസ്സിൻ നക്ഷത്രരാശിയിലില്ലൊരുമിന്നും
ആസുരീസമ്പത്തിലാളിപ്പടരുന്നു
മനുഷ്യപുത്രർതൻചിത
ഒടുക്കത്തെ വാക്കിന്നമൃതതീർത്ഥവും വറ്റി
കണ്ണിലെ തീക്കടലിരമ്പുന്നു
തീത്തെയ്യമുറയുന്നു
കാറ്റൂതി, കനലൂതി, യോഗാരൂഡനാം
അധിദൈവവും വിറയ്ക്കുന്നു.
