നഗരികാണിയ്ക്കൽ

പായിപ്ര രാധാകൃഷ്ണൻ

ഒരു കൃശപ്രവാഹത്തെ
നഗരികാണിയ്ക്കലിന്നിറങ്ങിയതാണ്‌
സ്മൃതിവൈവശ്യങ്ങളിൽ തളർന്ന്‌
മടിയിൽകിടന്ന്‌ മകളായി
ഒരിതരപ്രകൃതത്താൽ
ജീവപരാഗങ്ങളെ
പ്രകൃതിവിലാസങ്ങളെ
ജൈവാശ്ലേഷത്താൽ
സ്വായത്തമാക്കാനായുന്ന
പൂക്കളെപ്പോലെ
നാഗരികച്ചമയങ്ങളെവെടിഞ്ഞ്‌
പാതിവഴിയിൽ
എറിഞ്ഞുകളയാനാവാത്ത
പഴകിയ പാഥേയമായി
ഉപരിയാത്രയ്ക്കുള്ള
കുടുസ്സുലിഫ്റ്റിന്റെ
തണുപ്പിൽ ലഘുപാചകം
അടുക്കളയിൽവേവാത്ത അടുപ്പം
തൊടുകുറിയിൽ
പാതിവെന്ത തൊടുകുറി!
പതുക്കെപ്പതുക്കെ,
ചെറുചൂടിൽ,
പൊള്ളിക്കാതെ,ഒരു തുള്ളി!

ധ്യാനചന്ദ്രന്‍

പായിപ്ര രാധാകൃഷ്ണന്‍

അജന്തയിലെ
ധ്യാനബുദ്ധന്‍മാര്‍ക്കുപോലും
പാല്‍പ്പായസവുമായി
വരുന്ന സുജാതമാരും
അവരെ ഉമ്മവയ്ക്കാനിടം
നല്‍കുന്ന സ്വകാര്യതകളുമുണ്ട്‌.
അഹങ്കാരിയായ
ബോധിവൃക്ഷംമാത്രം
ആര്‍ക്കുംനിഴലനുവദിക്കുന്നില്ല!
തന്നിലേക്ക്‌ പടരുന്ന
ആത്മരതിയുടെ വേരുകള്‍
ആസക്തിയുടെ
ധ്യാനമര്‍മ്മം
സ്മൃതിശിഷ്ടങ്ങളില്‍
ഗാഢരഹിത
അധരസംയോഗങ്ങള്‍
തിരസ്കാരത്തിന്റെ
ചവര്‍ക്കുന്നചതുപ്പുകള്‍ക്കപ്പുറം
മൌനത്തിന്റെ  മഹാഗിരികളില്‍
വീണ്ടും രാഗചന്ദ്രോദയം

പാവഗന്ധർവ്വൻ

പായിപ്ര രാധാകൃഷ്ണൻ

പ്രണയിക്കാൻ ഒരു പാവക്കുട്ടി
പഴയ മുണ്ടുപെട്ടിയിൽ
പിന്നിയപട്ടുസാരിക്കുമടിയിൽ
ഓർമ്മകൾക്കിടയിൽ
പൂഴ്ത്തിവയ്ക്കാവുന്നഒന്ന്‌
ലാളിച്ചുംഓമനിച്ചും
മടിയിലും മാറത്തും
തലയിലും താഴത്തും
വയ്ക്കാതെ,
ചിതലരിക്കാതെ,
പേനരിക്കാതെ
ഒരു കളിക്കൂട്ട്‌
അച്ഛനും അമ്മയും
ഭർത്താവും അയൽക്കാരനും
കാണാതെ,
തീവ്രമായ ഏകാന്തത്തകളിൽ
കൂട്ടുവരുന്ന,
ഇണങ്ങാനും പിണങ്ങാനും
ഇറുക്കിപ്പിടിക്കാനും,
പാതിചാരിയ കിനാവുകളുടെ
കിടപ്പറകളെ,
സ്നേഹചുംബനങ്ങളാൽ
മുറിവേൽപിക്കാനും,
കൂട്ടിരിക്കാനും,
കൊക്കുരുമ്മിക്കൊഞ്ചാനും
കൊത്തിപ്പിണങ്ങാനും
തിളങ്ങുന്ന കണ്ണുകളും
തുടുത്ത അധരങ്ങളും
സ്വപ്നങ്ങൾ പൂക്കുന്ന
ഉടലഴകുകളുമുള്ള
ഒരു പാവം,
പാവഗന്ധർവ്വൻ!



--

വല്ലാത്ത മാമ്പഴക്കാലം

പായിപ്ര രാധാകൃഷ്ണൻ

സ്നേഹത്തിനായുള്ള
മത്സരത്തിൽ
ഒരു മാമ്പഴത്തിനായി
മൂവുലകം ചുറ്റിവരുന്നു
മണ്ണുംചാരി നിന്നവൻ
പെണ്ണിനെയും കൊണ്ടുകടന്നു.
കൗശലക്കാരുടെ റിയാലിറ്റിഷോ
മൂർച്ചയേറിയ കത്തിയിൽ
മാമ്പഴം പാളുന്നു.
വൈലോപ്പിള്ളിയുടെ മാവിൻ‍ചുവട്ടിൽ
എംഎൻ‍വിജയന്റെ മാമ്പഴത്തിര കാളുന്നു
ഒടിഞ്ഞ പൂങ്കുലയുടെ
മുറിവേറ്റബോധ സ്ഥലങ്ങളിൽ
തണുപ്പ് പടരുന്നു
ഹൃദയതാപത്താൽ മാമ്പൂവ് കരിയുന്നു