സിന്ട്രെല്ല

സജീവ് അനന്തപുരി

നിറങ്ങളില്ലാത്ത
നിശബ്ദ വേളയിലാണ്
അവളെന്റെ ശൂന്യമായ
കണ്ണുകളിലേക്കു
സൈന്‍ ഇന്‍ ചെയ്തു വന്നത്.

ഇന്നലകളുടെ മണവും പേറി
മൌസിന്റെ ശരാഗ്രം കൊണ്ട്
തൊട്ടു വിളിച്ചപ്പോള്‍
ഹൃദയത്തിലെവിടെയോ
ഒരാര്‍ദ്ര ഗീതമായ്
ഒളിഞ്ഞും തെളിഞ്ഞും
അവള്‍ വന്നു

കീ ബോര്‍ഡില്‍ വിരലുകളുടെ
മാന്ത്രിക നടനത്തിനൊടുവില്‍
പിറന്നു വീഴുന്ന
പ്രണയ വര്‍ണാക്‍ഷരങ്ങള്‍
ദൈവ നിയോഗത്തിന്റെ
ശിലാ ലിഖിതങ്ങളാണെന്നു
സ്വയം ആശ്വസിക്കുവാനും,
പുനര്‍ ജനികളുടെ
മണ്‍ ഫലകങ്ങളില്‍ എഴുതപ്പെടുന്ന
അനശ്വരമായ പ്രേമ കാവ്യമായ്‌
അവള്‍ ഉയിര്‍ത്തെഴുന്നേല്‍ക്കുമെന്ന
പ്രതീക്ഷക്കൊടുവില്‍

അധരങ്ങളില്‍ വിരിയുന്ന
പുഞ്ചിരി പുഷ്പങ്ങളുമായി
ഋതുക്കള്‍ അന്ന്യമാക്കിയ
ഹൃദയ തീരങ്ങളില്‍
വന്നു പോകുന്നത്
അവള്‍ തന്നെയാണ്

" സിന്ട്രെല്ല "

വ്യര്‍ത്ഥ സ്വപ്‌നങ്ങള്‍

സജീവ്‌ അനന്തപുരി 

വെളിച്ചമില്ലാത്ത സൂര്യനിലോ,

നിലാവില്ലാത്ത ചന്ദ്രനിലോ,

ജലം വറ്റിയ പുഴകളിലോ,

അലകളില്ലാത്ത ആഴിയിലോ,

മഴ പെയ്യിക്കാത്ത മേഘങ്ങളിലോ,

ഇരുള്‍ മുറിഞ്ഞ രാത്രികളിലോ,

അക്ഷരങ്ങളില്ലാത്ത പുസ്തകങ്ങളിലോ,

ഞാന്‍ നിന്നെ തിരയുന്നില്ല.

എങ്കിലും,

കഴുത്ത്‌ ഞെരിച്ചു കണ്ണ് തുറിച്ചു -

മൃതമാക്കിയ മോഹങ്ങള്‍ നെഞ്ചിലൊതുക്കി 

മലര്‍ന്നു കിടന്നു കണ്ണുകള്‍ തുറന്നു വച്ച് 

കാണാതെ കാണട്ടെ നിന്നെ ഞാനീ-

നിറങ്ങളില്ലാത്ത വ്യര്‍ത്ഥ സ്വപ്നത്തിലെങ്കിലും !!